តើអ្វីទៅដែលធ្វើអោយមានជំងឺទល់លាមក? | What Causes Constipation?
ក្នុងប្រទេសកម្ពុជា មានមនុស្សជាច្រើនដែលរងគ្រោះដោយជំងឺទល់លាមក ប៉ុន្តែមានមនុស្សតិចតួចបំផុតដែលដឹងពីមូលហេតុ។ ដោយការមិនដឹងពីមូលហេតុនេះហើយ ទើមអ្នកជំងឺក្លាយជាជនរងគ្រោះម្តងហើយម្តងទៀត។ របបអាហាររបស់ប្រជាជនខ្មែរមួយចំនួនដែលនាំទៅរកជំងឺទល់លាមកមានដូចខាងក្រោម:
•របបអាហារ:
ការបរិភោគចំណីអាហារដែលសម្បូរទៅដោយជាតិខ្លាញ់គឺជាមូលហេតុចម្បងនៃការកើតជំងឺទល់លាមក។ មិនត្រឹមតែប៉ុណ្ណោះ កង្វះសារធាតុសរសៃហ្វៃប៊ឺនៅក្នុងរបបអាហារក៏បណ្ដាលអោយមានជំងឺទល់លាមកផងដែរ។ នៅប្រទេសកម្ពុជា ប្រជាជនភាគច្រើនចូលចិត្តទទួលទានអាហារហិល និងសាច់។ ទាំងនេះហើយដែលនាំអោយមានការទល់លាមកធ្ងន់ធ្ងរ។ ក្រៅពីនេះ ការទទួលទានទឹកក្នុងបរិមាណតិចតួចក៏បណ្ដាលអោយមានការទល់លាមកផងដែរ។ ការកើនឡើងបរិមាណនៃជាតិកាហ្វេអ៊ីន និងជាតិអាល់កុលគឺជាមូលហេតុមួយទៀតដែលមនុស្សជាច្រើនកំពុងប្រឈមនឹងជំងឺទល់លាមក ព្រោះជាតិទាំងនោះធ្វើអោយសារពាង្គកាយមិនអាចស្រូបយកជាតិទឹកបាន និងថែមទាំងបញ្ចេញចោលនូវជាតិទឹកដែលមានក្នុងរាងកាយទៀតផង។
•ការបន្ទោបង់មិនត្រឹមត្រូវ:
ជាធម្មតា ប្រសិនបើខ្លួនប្រាណរបស់អ្នកចង់បញ្ចេញចោល តែអ្នកមិនចង់បន្ទោបង់ទេនោះ វានឹងបង្ករជាជំងឺទល់លាមកធ្ងន់ធ្ងរ។ បន្ទាប់មកទៀត អ្នកនឹងអាចឈប់មានអារម្មណ៍ឈឺបន្ទោបង់ទាំងស្រុង។ វាធ្វើអោយអ្នកទទួលរងគ្រោះដោយជំងឺទល់លាមកធ្ងន់ធ្ងរ។ មនុស្សជាច្រើនតែងតែព្យយាមជៀសវាងការបញ្ចេញចោលដោយយកការជាប់រវល់ ឬគ្មានពេលវេលាជាលេស ប៉ុន្តែវាទៅវិញទេជាមូលហេតុដែលអ្នកគួរជៀសវាង។
•ថ្នាំពេទ្យ:
អ្នកប្រហែលមិនដែលគិតទេថាថ្នាំពេទ្យក៏ជាកត្តាដែលបណ្តាលអោយកើតជំងឺទល់លាមក។ មានថ្នាំជាច្រើនដែលបណ្តាលអោយទល់លាមក។ សូម្បីតែថ្នាំបំបាត់ការឈឺចាប់ក៏អាចបណ្តាលអោយមានជំងឺទល់លាមកផងដែរ។ ក្រៅពីនេះ មានប្រភេទថ្នាំដូចជា ថ្នាំបន្សាបអាស៊ីតក្រពះ ថ្នាំបន្ថយស្ត្រេស ថ្នាំបំបាត់ជំងឺរាគរូស និងថ្នាំជាតិដែកផ្សេងៗទៀត អាចបណ្ដាលអោយអ្នកមានជំងឺទល់លាមក។ ថ្នាំទាំងនេះត្រូវបានប្រើប្រាសយ៉ាងទូទំទូលាយដោយអ្នកជំងឺ ដូច្នេះប្រសិនបើមាននរណាម្នាក់បានទទួលទានថ្នាំនេះ ហើយមានការទល់លាមក អ្នកអាចព្យបាលវាបានយ៉ាងងាយ។