តើសព្វថ្ងៃបច្ចេកវិទ្យាកំពុងជួយដល់មនុស្ស យ៉ាងដូចម្ដេច? | How Advancements in Technology are Helping People Today
បច្ចេកវិទ្យាត្រូវបានលូតលាស់យ៉ាងឆាប់រហ័ស។ ក្នុងមួយនាទី ឧបករណ៍មួយប្រភេទត្រូវបានបង្កើតឡើង។ មួយនាទីក្រោយមក វាក៏ត្រូវបានគេឈប់ប្រើ។ ភាពជឿនលឿនខាងបច្ចេកវិទ្យាគឺអស្ចារ្យខ្លាំងណាស់។ ក្នុងនោះក៏មានបច្ចេកវិទ្យាដែលជួយអ្នកជំងឺរងគ្រោះដោយសារបញ្ហាផ្លូវចិត្តផងដែរ។
ខាងក្រោមនេះជាឧទាហរណ៍ខ្លះៗអំពីបច្ចេកវិទ្យាកំពុងផ្លាស់ប្តូររបៀបព្យាបាលអ្នកជំងឺផ្លូវចិត្ត :
- កម្មវិធីត្រួតពិនិត្យដោយខ្លួនឯង : ទោះបីជាមិនមានកម្មវិធីណាមួយសំរាប់វិនិច្ឆ័យថាតើមនុស្សម្នាក់មានវិបត្តិផ្លូវចិត្តយ៉ាណាក៏ដោយ ក៏មានកម្មវិធីជាច្រើនត្រូវបានអភិវឌ្ឍឡើងដើម្បីគ្រប់គ្រងស្ថានភាពសុខភាពផ្លូវចិត្តដែរ។ កម្មវិធីនេះមានឈ្មោះថា self-management apps។ កម្មវិធីនេះមានសមត្ថភាពរំលឹកអ្នកជំងឺអោយលេបថ្នាំ និងក្នុងកំរិតដែលត្រឹមត្រូវ។
- កម្មវិធីបណ្តុះបណ្តាលជំនាញ : អ្នកជំងឺដែលទទួលរងគ្រោះពីជំងឺផ្លូវចិត្តដែលធ្វើអោយពួកគេអសមត្ថភាពរាងកាយ នឹងទទួលបានអត្ថប្រយោជន៍ពីកម្មវិធីទូរស័ព្ទនេះដូចជា ការបណ្តុះបណ្តាលជំនាញ។ កម្មវិធីបណ្តុះបណ្តាលជំនាញបូករួមបញ្ចូលទាំងវីដេអូសុខភាពល្អៗ ដែលណែនាំពីវិធីព្យាបាល ក៏ដូចជាការហ្វឹកហាត់ផ្សេងៗ។
- ការថែទាំសុខភាពផ្លូវចិត្តតាមអ៊ីនធឺណិត : គេហទំព័រដើម្បីថែទាំសុខភាពផ្លូវចិត្តជាច្រើនត្រូវបានបង្កើតឡើងសម្រាប់មនុស្សដែលរស់នៅក្នុងតំបន់ដាច់ស្រយាល ឬសម្រាប់អ្នកដែលមានភាពអៀនខ្មាស់ក្នុងការនិយាយពិគ្រោះយោបល់ជាមួយអ្នកជំនាញផ្នែកសុខភាពផ្លូវចិត្តដោយផ្ទាល់។ គុណវិបត្តិនៃកម្មវិធីនេះគឺវេជ្ជបណ្ឌិតមិនអាចវាយតម្លៃ និងស្គាល់ពីកំរិតនៃស្ថានភាពជំងឺបានពេញលេញឡើយព្រោះអ្នកជំងឺ និងអ្នកជំនាញមិនជួបគ្នានិយាយាផ្ទាល់មាត់។ មានអការ:ជាច្រើនដែលមិនអាចបកស្រាយតាមការសរសេរ។
- ការប្រមូលទិន្នន័យក្រោយពីការស្រាវជ្រាវដោយប្រើទូរស័ព្ទនិងកម្មវិធី : មានការស្រាវជ្រាវទៅលើជំងឺផ្លូវចិត្តជាច្រើនដែលត្រូវបានធ្វើឡើងដោយការធ្វើតេស្តព្យាបាល និងកំណត់ត្រានៃអ្នកជំងឺដោយផ្ទាល់មាត់។ ប៉ុន្តែមានអ្នកជំងឺមួយចំនួនមិនពេញចិត្តក្នុងការធ្វើតេស្តបែបនេះនោះឡើយ។ ដូច្នេះ អ្នកស្រាវជ្រាវមួយចំនួនបានបង្កើតកម្មវិធីដែលអាចប្រមូលទិន្នន័យពីអាកប្បកិរិយារបស់មនុស្ស និងកត្តាដទៃទៀតដែលប៉ះពាល់ដល់សុខភាពផ្លូវចិត្តរបស់ពួកគេ។ ធ្វើដូច្នេះ អ្នកជំងឺមិនមានភាពអៀនខ្មាសក្នុងការចែករំលែកអំពីរោគសញ្ញា និងបទពិសោធន៍ផ្សេងៗរបស់ពួកគេនោះទេ។
- ការជួយគាំពារពីចម្ងាយ : អ្វីដែលល្អបំផុតដែលអ្នកអាចធ្វើបានដើម្បីជួយអ្នកជំងឺគឺការផ្ដល់សេចក្ដីស្រឡាញ់ ការគាំទ្រ និងការអត់ធ្មត់។ ប៉ុន្តែមានអ្វីកើតឡើងនៅពេលដែលអ្នកនៅឆ្ងាយ? ការរីកចម្រើនផ្នែកបច្ចេកវិទ្យាដូចជាទូរស័ព្ទស្មាតហ្វូន និងប្រព័ន្ធអ៊ីធឺណិតអនុញ្ញាតអោយអ្នកជំងឺទាក់ទងជាមួយមនុស្សជាទីស្រលាញ់របស់ខ្លួន បើទោះបីជាពួកគេនៅឆ្ងាយពីគ្នាក៏ដោយ។
បច្ចេកវិទ្យាអាចជួយអ្នកជំងឺផ្លូវចិត្តបានមួយចំនួន។ មិនថាប្រជាជនខ្មែរ ឬមនុស្សជុំវិញពិភពលោកទេគឺសុទ្ធតែទន្ទឹងរងចាំមើលការវិវឌ្ឈន៍នៃបច្ចេកទេសទាំងនេះ។